بصرخ بعزم الصوت
يا نعيش سوا يانموت
والموت ما هوش بالجوع
والعيشه مش بالقوت
مدينا ايدينا سنين
والدين صبح ميت دين
عمر الخلاص ما يكون
فى طريق ظلام مسدود
والدين همومه كتير
ف رقابنا طوق مربوط
قوم يابنى شد الحيل
وازرع وكل بإيدييك
دى الأرض لسه عمار
واللقمه حتكفيك
شرك الضلال منصوب
علشان تبات مغلوب
بيكتفوك بالقوت
وبيضربوا المربوط
علشان تخاف وتموت
بعنا آمال ونفوس
علشان رغيف وغموس
وصبحت يا ولداه
بين فك ديب ولصوص
زندك مادام موجود
إياك تميل ع الغير
واروى الأراضى البور
وابدر تقاوى الخير
خصمك يموت محصور
ونعود لحضن النور
حرس من التعبان
وده قرصته والموت
واياك تعيش فى الكون
موجود ومش موجود
وازعق بعزم الصوت
يا نعيش سوا يا نموت
***
سألونى مين ملهمك؟
رديت و قلت أمى
ربتنى من عطفها وحفظتها ف دمى
ان قلت آه ترتعد ماهى أصلها أمّى
قالو ومين بعدها؟
قلت الأب وحنانه
وسنين محضّن قوى وواهبنا وجدانه
وفى خيره عيشنا سوى زهور ف بستانه
قالو ومين؟ رديت
صبية من حسنها ساكنة عروق دمّى
خدنى حنان قلبها دايماً تشيل همى
فى سحرها حورية وف عطفها أمى
قالو ومين بعدهم؟
قلت الوطن والنيل
وبحر ناثر فى بلدى الفل والأكاليل
وولد صغيرقوى بيعشق المواوويل
قالو ومين بعدهم؟
قلت قدسى الحزينة
وسور بيفصل ولادها عن أغلى مدينة
وغصن زيتون رويته بدمانا فى سينا
قالو ومين بعدهم؟
قلت البحور والدم
تسيل وتجرىبالأسى والهم
قالو لى ليه يا ترى
أنا قلت قاتل ومقتول ولاد عم
قالو ومين بعدهم؟
قلت الغبى الأرهاب
وشظايا ترمى الجثث ما حددو أسباب
والجانى منى أنا لكن طالع له ناب
قالو ومين بعدهم؟
قلت اللى باعو ضمير
ودمروا فى الوطن برضه بدون تفسير
قالو ومين بعدهم؟
قلت بنى صهيون
وجيش كبير الاعادى
وهجمته المجنون
وظلم بين لنا لكن فى يوم هيكون
أعصار يزيل حصنهم بإذن رب الكون
سألوا وليه ماخافوا ربنا
قلت العظيم هو
يمنحنى كل الأمل
و العزم والقوة
قادر يهدّ القوى!!!
هو الكريم هو
المشـــــــنقة على كل بـــــــــاب
~~~~~~~~~~~~~~~~~~
وإتلفّ حبل المشنقة
وإتجمـّعت فى الحلق غصة من المهانة والأسى
عقدت لسانى المهزلة , وكأنى منحوت من جليد
وفضلت ملهوف إنى أفتح من كابوس خانق عنيد
والقلب متحسّر حزين
رغم العداوة اللى ما بينى وبين جميع الجلادين
إن كانوا زُعما .. ولا عُملا .. ولا وجهة لأى دين
لكنه كان مشهد مهين
والحبل , رغم البعد , حازز فى جسدنا أجمعين .
**********
ســيّدنا “بوش” الطاغية
يحلم , فحلمه يصير حقيقة
زى حــلم الأنبيــا
يُأمر وينهى وسرّه باتع
زيه زى الأولــيا
يكذب فتتحرك بوارج بالجيوش والألوية
الطاغية شــاف فى المنام
علشانه مغرم بالعدالة وعشقه جارف للسلام
إنه يحرر شعبنا من الطغاة المغمورين
ده لأنهم متنمردين
بيعضّــوا إيد الأمريكان
مع إنها نافخة ف صورتهم .. وإرتضتهم من زمان !
والرؤية باينه مفسـّـرة
كل الأمور متدبّــرة
والحبل موصول من أميركا لحد باب المقصلة
وكبيرنا “بوش” عنده الإجابة عن جميع الأسئلة :
كام حلقة لازمة للمحاكمة المهزلة ؟
مين الشهود والجلادين , وإمتى يوم المقصلة ؟
كام لفـّـة هيكون الكفن ؟
فين الجسد راح يندفن ؟
حتى الحداد والحزن ودموع الفراق
لازم له تصريح من هـنـاك .
**********
قالوا اللى مكتوب ع الجبين
لازم تشوفه كل عــين
ليه من ســـــنين ,
ما شوفنا غير اللى إنكتب بالأمريكانى ع القفـــا ؟؟
**********
إرفـع جبينك يــا أخى
وإفــرح فى عيـد الأضحية
وإوصف شعورك لمـّـا مال راس الزعيم الطاغية !
إتشــفـّى فى الراس اللى مال
وإنسى إن خــدّك صار مداس تحت النعال
وإتهنى بجيوش لإحتلال
دايسة ضلوعك يا عراق بالأحــذية .
**********
إرفـع جبينك يــا أخى
وإلمح بعينك تلتــقى
على كل رقبــة مشــنقة
والكل مسحوب من رقابه
الكل جــوّه المحــرقة
رغم الدروب متفرقــة
على كل رقبــة مشــنقة
والعقدة كل ما تتحَكـَـم , مناخيرنا تعــلا فى الســما
حتى البريق فى العين يزيد واللى يشوفنا كأنما
أحـــرار على أرض الوطن
ماشــيين ورافعين الجبــين
من حبكة العقدة اللى قافشة فوق قفــانا أجمعين !
**********
إرفــع جبينك وإلتفــت
تلمح “صلاح الدين” .. “عــرابى” .. و”الحســين” .. و”عنتـــرة”
متجرجرين وسط الشوارع فى طـــابور المقصــلة .
**********
المشــنقة على كل بـــاب
المشــنقة ف كل الرقــاب
تحت العباية والحجـــاب
والكل بيخبـّـى الحبــال
تحت القميــص .. تحت العُـقــال
تحت الجرافتة الأنيقة والكوفية والجــراب
ولا فـرق بين أهل الكتـاب .. والمهووسين والملحـدين
ولا فــرق بين كل الطوايف .. أى ملــّـة وأى ديــن
الحبل حــازز ع الرقـاب
فما تظلموش الحاكمين
وتعايبــوا ع الصمت المهين
ده الحبـل مُش سامح بغير قــولة : آمين !
الحبــل لافـف ع الرؤوس
الحبــل بيهز الكراسى والعروش
الحبــل كاتم ع الكروش
الحبــل لاجم ع اللســان
والطــرف ماسكه الأمريكان
ومن المحيــط حتى الخليــج مفرودة أرض المقصــلة
أرض العروبــة المستباحة والعروش المنظــرة
ما فارقشى وقفــة ولا عيــد
وف كل أوقــات الصــلا
المشــنقة متحضـــــرة .
**********
وعشــان حصل من ربع قرن وماتوا ميّـــة فى “الدجيــل”
لابد من مليــون قتيـــل
علشــان نوضّــح غلطتــه
وإنشــالله تســـقط دولتــه
لابد تتطهــر نفوســنا بالمدابــح والدمـــار
حمامات الدم تغســل فى الشوارع ليل نهـــار
وعشان ما تتطهــر بلادنا من ماضيها الديكتاتور
لابد من دك المصــانع والجوامــع والجســور
لابد من حرق المــزارع والجنــاين والقصــور
لابد من نبـش القبــور
حتى ولو كان الثمن
وطن بحـــاله ينـــدفن .
**********
يا راجعين أرض الوطن متحملـــين ع الدبابــات
فى الوحــل مرّغــتوا الكرامــة والمعانى والرايـــات
كل الرايــات اللى ف ســمانا فى العلالى محلــّــــقة
مجــدولة وإنفتــلت خيطانها فى حبــال المشــنقة .
**********
طــاهر كمــال
أحدث التعليقات