السنين ديّه …
السنين ديّه …
غير اللي فاتت…
واللي عدت…
واللي ماتت…
واللي راحت..
واللي تاهت …
ف السنين ديّه
دقنا المرارة والقهر
شفنا الندالة والعهر
شفنا النظام
من غير كلام
على طول ايديه…
يرمى الوطن ف البحر
شفنا الإمام
وابن الإمام…
ف كل طلعة صباح
يرجّع الشعب…
عطشان م النهر
كل دا كان من زمان
بس زاد السنين ديّه
***
ف السنين ديّه
الغلا فاحش…
طيّر عقول الناس
خلّى الكريم منداس
طفّى نور الفرح…
مات احساس ورا احساس
والعريس طفش…
والعروسة مزّقت فستان
والفقر طرح عيان
والقلب أصبح حجر صوان
وف الأرض …
فلاح ركن فاسه
وشاب كتم أنفاسه
وزرعة تحت التراب صابرة
مشتاقة لشربة مياة
مشتاقة لنفضة حياة
والناس عطشانة…
كل دا كان من زمان
بس زاد السنين ديّه
***
ف السنين ديّه
شفنا الاحتجاجات
جنب الاعتصامات
والعمال قالو .. آه
الضرب ف الميت حرام
السرقة ف المعدم حرام
وصوتهم يلالي ….ف العلالي
إحنا عايزين حقوقنا
والأمن يبعد عن طريقنا
وف عملنا …
وفروا للمكن خامات
والنقابة بأنزه انتخابات
تبقى المعادلة كده…
يطلع لهم م البوكس عفريت
ماكر قوي وحويط
بالطبطبة والإرهاب
يرجع المارد سجين
جواه قلب حزين
والوطن مستني …
كل دا كان من زمان
بس زاد السنين ديّه
***
ف السنين ديّه
شفت الأمل…
ف عيون وعقول شبان
ف غنوة..وكلمة فنان
ف وقفة معارض …
تحت شمس الوطن
ماليه الوجع والشجن
رافض يرضى بالفتات
رافض بيع البلاد
رافض توريث الولاد
ينادي بعلو الصوت
رافض ظلام الظلم
رافض يعيش ف الهم
ويصرخ أنا ح أتغير
ح اطلب بحق أولادي
ح ارجّّع الخير لبلادي
وف السنين ديّه…
أنا مصري حتى النخاع
أنا مصري حتى لو جاع
أنا مصري ح اطرد اللي باع
أنا مصري وحقي اللي ضاع
ح ارجّعه ف السنين ديّه
ح ارجّعه ف السنين ديّه….
د / عاطف الحديدي
د/ عاطف الحديدى .. شرفت الموقع وكلامك عن مصر يوجع
بس للى يحس واللى عينه تدمع
اهلا بيك وبكتاباتك وشرفتنا مره ثانية
مدير الموقع/ جمال حمزة