ديسمبر 272009
أطفال غــــــــــزة
يا غزة قلبى إنفطر والحزن كان جامح
العار أكل وشنا والحزن بان جارح
مافاضلشى حُمرة خجل فى وجهنا الكالح
ولاحتى برقع حيا يرسم لنا ملامح
* * *
الدم ده دمّنا.. مهدور على الأنقاض
واللحم من جسمنا.. مبدور على الطرقات
والطفل ده إبننا.. مهروس بألف مداس
والعِرض ده عِرضنا.. محروث بعاشر فاس
* * *
ياطفلة كان جريها مبهورة بالفراشات
لمعة عينيها إنطفت وإتمزّعت قصاصات
ودى طفلة كان عشقها للرسم والألوان
مسروقة من حلمها ملفوفة فى الأكفان
* * *
حتى رضيع مولود لسّه بقاله ساعات
من بعد حمل شهور فى البطن فى الظلمات
كان فى إنتظاره لهيب صواريخ وطيارة
شرقان ختم رضعته فى مجزرة وغارة
* * *
ياطفل كان فرحان بالهندسة والجبر
حالف يصير قبطان ويشق سابع بحر
الموت دفن حلمه تحت الحطام والحفر
وده اللى نام موعود باللعب والفُسحة
عصر المجازر حكم :يحرم عليه يصحى
وجهه البرئ إتغلط .. وسط الحجر والزلط
* * *
ياهلترى”فيروز” لسّاها محتارة
ترجع صبية تقول : طيرى يا طِيارة
ماعادتشى تحلم تانى ينساها الزمان
ع السطح طفلة صِِغيرة تلعب مع الجيران
لأن جيش التتار مستنّى بالمرصاد
يحصد أمانى البنات فى الردم والأنقاض
* * *
آه يا زمان الهوان
أعمار ولادنا نيشان على صدر جنرال جبان
وصهاينه على أمريكان
سايقين علينا الجنان
وعروش كلتها الديدان
حاكمانا بالصولجان
والشعب تاه وإستكان
مقفول عليه البيبان
وجيوش ظلمها الزمان
مرصوصة برّه الميدان
ده العدل ملهوش مكان
فى خريطة للأمريكان
يا عروبة خلف البيبان
لسّه ماجاشى الأوان؟
آه يا زمان الهوان
آه يا زمان الهوان.
د. طاهر كمال
آآآآآه يا زمن الهوان أحمد الله أن هناك من لا يزال يستطيع صياغة الكلمات لتخرج بتلك الروعة فقد أخرسني الموقف وتبلد إحساسي و أجد أيا من كلماتي صغير ضعيف جنب ما أشعر به تجاه ذاك الكلب الحاكم لأمة كانت لها شأن في الماضي وتعين على مصائب الدهر فانقلبت إلى من يعين العدو والدهر على أضعف الناس ولكن أشرفهم أهل غزة