بلدى .. يا حضن مليان بالدفا

يا نبع للخير والوفا

يا زرع أخضر فيه شفا

بلدى يا جنة ربنا على أرضنا

يا أم المداين والجناين

خضرا تجرى ف دمنا

بنتك أنا .. نبضك أنا

صورتك أنا يا حنينه

إبنك أنا .. زندك أنا

فارس وحافظ سكتك

حالف راح أمسح دمعتك

اتكلمى يا مؤمنه

ليه الدموع بلمح صادها فى ضحكتك ؟

قلبى عليكى يا مصر يا أم الوجود

ده أنا حبى ليكى مالوش حدود

النيل على ضفافك بكى

من قسوة الناس واشتكى

بيقوللهم أنا منكم

بجرى هنا من كام سنه

لا يوم شكيت

ولا عمرى يوم أنا ضهرى مال

من حملكم

زارع أنا .. حاصد أنا

وميتى دم بيسرى فى أرضكم

تروى الورود تطرح سنابل قمحكم

قلبى شراع فارد لكم

ستر وغطا

ده أنا كنت ضلة

وكنت أحلى من القمر

ونسايمى ياما إتونست

بيكم وقامت ملست على شعركم

ليه تجرحوا حارس أمين على عرضكم

يلمح خطر .. غدر .. وقدر

حط ف قلوبكوا يا ناس حجر

آه .. صبرى نفد من ظلمكم

آه .. ضهرى أنقسم من حملكم

واقع أنا وف عرضكم

خلونى طاهرة ده ربنا

قال إن أنا أصل الحياة

منكم وليكم أصلكم

يعنى أكيد حرجع لكم

بس الأكيد بالشكل ده

حرجع سموم

تجرى وترعى ف دمكم

***

زمانى مغارة ** وحياتى جداول

مقاول عمارة ** وزمانى مقاول

أورد حجارة ** يورد معاول

حلفت بهمومى ** وصلاتى وصومى

وحزنى العمومى ** ده يومك ويومى

فيا مهرة زومى ** وحاولى تقومى

تقول لى بحاول ** بحاول بحاول

                   ***

زمانى شاويش ** وحياتى حوارى

غباه أكل عيش ** وافتراه اضطرارى

عليه شبر خيش ** عورتُه لم يدارى

شاويشى ولية ** برتب عسكرية

بتصعب عليا ** كتير مش شوية

وبتهد فيا ** فنوقع سويّة

ونرجع نحاول ** بحاول بحاول

   ***

زمانى كمامة ** وحياتى جُمل

أبو زيد سلامة ** وكرسى بعجل !

وقلة كرامة ** وقلة خجل

وجاى المقدر ** على يد مُحضر

جهنم تبشر ** هَوا وحسن منظر

وجامع مُدمر ** يحاول يكبّر

وانا معاه بحاول ** بحاول بحاول

صورة بألوانها الباهتة

بتنسِيني ليوم العيد

اَسرح فى الأشكال حواليّا

وبألوانها تنادي عليّا

بتورِّيني سر جديد

وتورِّيني ف معنى وتاني

وتعدِّيلي ساعات وثواني

وتأكدلي ف تالت معنى

إن الصورة واضحة أكيد

علشان هي صورة بسيطة

واللي رسَمها صَوَّر حيطة

بس غريبة شوية عليّا

كل ضلوعها حديد ف حديد

والحيطة مرسومة لتحت

مش باينة من جوة الفَحت

والباين بلدوزر شايل

لحديدة يغرسها بعيد

والحيطة بتِقسِم ف الارض

بتقَطَّع من عَرض وفَرض

وتباعد بين الاحباب

بتجوَّع وتحاصر بيت

الصورة بِتِألِم وبتنزِف

وبتاخُد من دمِّي وتِغرِف

واتاريني ف الجنب الآسي

بَتساءِل .. والعقل شريد

ليه الإيد الحاكمة بِترسِم

بفواصل ومَعابِر تِقسِم

بين القلب الواحد تِدمِي

والفايدة مش عايدة اكيد

ليه الحاكم ينسَى الأصل

إن الأصل ياناس الوَصل

وبيرفع للعار .. ف جدار

صورة باهتة بالتأكيد

والصورة مش صورة شعب

دا الشعب عايش ع الصعب

سِجن وحُزن وهَم كمان

بالصورة مش يعني سعيد